Jude

b 1:9 Sak 3:2

f 1:14 Sen 5:1-21

Siud

Selusien koa helamu ten Siud

Isei mutis selusien koanik?

Meatin koa mutis selusien koanik, isen Siud (1:1). Kei viteni keke vi slev onen Iesu Kristo ka tunali Tiemes (1:1). Kei vi tunali Iesu koa isen tamun vi Sudas (Mat 13:55; Mak 6:3). Avaseini Siud ka Tiemes, tunali Iesu keilu, lurkultei anatin en Iesu navong moul semau (Sion 7:3-10), keilu lukul anatin esuk katau en matien onen (Umen 1:14) ka lumai luvi elda en sios onen Kristin keil (1 Korin 9:5; Kal 1:19).

Isei vuli selusien koanik mulamu?

Siud mutis selusien koanik va min Kristin keil en out vasi (1:1) vesesal en ouh 65 AD. Kei mul mutis min keil veni kur longlongien keke tiser taliluvosien keil amul avisein keil en sakien keil koa romaltei.

Siud mutis selusien koanik vensa?

Siud sel kat Kristin keil anousiltei koakeil moulien one tisa — Tei en tiser keil aviteni keke Kristin keil akilea avoum vatisa vamukave veni more envatien onen Ahi marite imok (1:4,8), ka Siud viteni keke Ahi hesan mahien min koakeil amum tisa (1:5-13).

Siud sel kat Kristin keil avousil kat hihiseien keil enges koa vi anatin — Siud sel kat Kristin keil keke avalomal vakeih en demkatien koa Iesu ka eiloheh keil onen alingi tuai mul en meatin keil onen Ahi (1:3). Hemukonek, keil il ilomal hekeih veah navong Asuv Iesu Kristo hemai ris eni (1:21).

Mari rendemien tai ten selusien koanik mul en Siud 1:3

Onak eli keil ... tahos imok keke nisel kat kami mau keke miheles mihelomal hekeih en anatinien ten demkatien onami. Koanik vi vati demkatien koa Iesu ka eiloheh keil onen alingi tuai mul en meatin keil onen Ahi ka amundesin keil eni.

Asa mul en selusien koanik?

1. Selkatien keke Kristin keil avale kokoe revi ven tiser taliluvosien keil (1:1-16)2. Selkatien keke Kristin keil availea revi hihiseien ten anatinien keke demkatien one hemoul hemarite (1:17-23)3. Selusien ekor (1:24-25)

1 Inau, Siud, namutis leta koanik. Navi slev onen Iesu Kristo ka Tiemes vi tuak kati.

Namutis va min kami koa Ahi Tata vise kami mivi onen, koa mimul en envatien onen, ka koa mimul en leikokoeen onen Iesu Kristo.

2 Navis Ahi keke enmahisien, tomat, ka envatien onen hel hemarite mok en moulien onami.

Selkatien Usil Tiser Keil Taliluvosien

3 Onak eli keil, navong nasak mesenau keke matis vahat min kami usil moulien hau koa rokuri ka en demkatien orer, namundem kat tounah koa hetetamen mulin koanek keke niselus usili min kami. Tahos imok keke nisel kat kami mau keke miheles mihelomal hekeih en anatinien ten demkatien onami. Koanik vi vati demkatien koa Iesu ka eiloheh keil onen alingi tuai mul en meatin keil onen Ahi ka amundesin keil eni. 4 Naviteni mukonek veni naraengon kotehei keke meatin tei koa arvouhoutei ven Ahi aka lelau avapil en vangi meatin keil onami ka mirlei kileatei. Keil avilehiles more envatien onen Ahi mai vi sise ten tisaen. Amul avisein meatin keil keke akilea avoumon tisaen vasi keil ven avit Ahi hersantei mahien min keil veni more envatien onen marite mok mulin tisaen keil one. Mukonek, koakeil enek alei sesein Iesu Kristo koa kei enges vi Avat ka Asuv orer. Veni tounah koa keil amul amumoni, Ahi hesan hakot min keil suval koa viteni tuetin tuai en Tus Votut onen.

5 Avaseini mikilea en tunien keil eke tuai, ekvati mahit risi min kami keke mihendem kilea keke Ahi mul san hakot min koakeil amum tisa. En avong mulamu, Ahi mutut me-Isrel keil amemea ran out Isip, ka katau, navong tei en keil arkultei anatin eni, kei san hakot en keil ka mu rasil lin keil. 6 Mihendemi emun asa kur out navong angelo keil koa aro kattei en hetetamenien one, ka alokovein vulei kati koa Ahi ling kei keke amul ien. Sakini, Ahi san hakot min angelo keil enek, par kat keil en sen takeih ka son keil uva avato en mankoli en out onen Temat. Anatin, Ahi ling keil amul en out enek keke avato sin mari Avong ten Hakot, avong koa Ahi hesani suk mahien min keil. 7 Mihendem emun usil asa koa kistal en meatin keil ten out Sodom, Komorah ka meteimal keil amul vesesal. Lises, keil asak tisa ral min ahin keil ka meahos keil emun. Sakini Ahi san hakot min keil, ka mahien koa akuri mul rie lati min meatin sav keil mahien ten ahang koa sakras vavus koa hekikistal en keil munak amusil vati sakien one.

8 Ka tiser taliluvosien keil enek koa umai akapil vatal min kami, keil amul amusil vati sakien onen meatin tatisa keil enek telamu. Keil avit akur leisanien keil koa maen keil avasak tisa vatal min meatin sav keil en ave. Keil asesein koakeil akur hetetamenien en out netan ka aselus karen koakeil akur hetetamenien en out nesa emun. 9 Anatin, avaseini keke Maekel vi vativar onen angelo keil, kei metauni vaselus karen angelo sav tai. Navong Maekel selus retavoai ral min Temat usil isei en keilu hekur teiai onen Mosis, ^{▼▼1:9 Tunien enek mul en tus telamu onen me-Siu keil koa avise en 'Assumption of Moses'.} Maekel metauni keke vaselus karen Temat, sakini vitenis mukok vit, “!Ahi Asuv heling hakot enuk!” ^b 10 Ka tiser keil enek amul aselus karen tounah vasi koa arkilea revitei. Ka amul amumon sakien tatisa keil koa ave enges envati avoumoni suval tirendan keil koa ileilien one tovuol. Ka vati sakien keilek varei mul purun keil. 11 !Aue li! !Ahi hesan mahien koa hemarite heha min keil! Hesani min keil veni amul amusil sise tatisa onen Ken koa mu vini tunali ven hieluen. ^{▼▼1:11 Sen 4:3-8} Keil avi uti mane suval provet Balaam telamu ^{▼▼1:11 Nam 22:1-35} koa kalah maen kei valamun meatin keil onen Ahi avoum vatisa keke vakur mane. Ka suval Korah ka onen keil koa asesein hetetamenien onen Mosis, avat one, ^{▼▼1:11 Nam 16:1-35} tiser taliluvosien keil enek ale sesein hetetamen keil one. Ka suval kistal en Korah koa onen keil, Ahi hou vini tiser keil enek ral min koakeil amusil.

12 Navong kami en sios umai akanian vituai, tiser taliluvosien keil enek emun umai. Ka veni asak visi avaleh rendemien onen meatin sav keil avoum vatisa vatal min keil asuval amai koa mul ro suai keke vasakin sip tai mahoi lel eni. Ka avaseini avit amul avengan meatin keil en anien ten demkatien suval meatin keil alosil kat sipsip keil, amul avengan revi keil enges en anien keil onami ka memouen tovuol. Keil asuval mahmah heisavos koa eang mul muhi, ka rosantei ous vous. Anatin, asuval vatiai koa romundemi hekur heite, ka en avong mal teni, heite tovuol varei. Ahi les keil suval umat ka hesan hakot ten matien min keil hesuval akahut lelat vatiai koa rosantei heite keke vamat. 13 Keil arro kattei suval atas koa langlango, ka sakien tatisa keil one asuval sikokohin teni koa mul vo en sisi atas. Rosakras rovaling desien orer en keil keke avalamunir en sise koa mal veni asuval hitu keil koa amemea ten avong havivis, evus, avupuol eris uva en out koa Ahi mumoni ven keil, uva en mari mankoli ten lisenges.

14 Inok, kei vi avu telamu tai onen meatin keil ten out netan koa ka en vatiamal onen Adam, ka musil moeite keil, kei vi oulu (7) en keil. ^f Ka en avong mulamu, kei ra usil vati mahien koa Ahi hesani min tiser taliluvosien keil enek vit, “?Milesi? Ahi Asuv mul mai ral min angelo votut keil onen koa avi houlu vis avi houlu mok 15 keke hesan hakot min meatin keil ven sakkalkalien keil one koa amumoni va kat Ahi, ka ven selusien takarien koa asoni va kat kei.” ^{▼▼1:14-15 Selusien koanik avotini en tus telamu tai onen me-Siu keil koa avise en 1 Inok, en 1:9 teni.}

16 Tiser taliluvosien keil enek, amul aselus kutut lisenges, ka tuetin, arie lat tisaen onen meatin sav keil. Amumon sakien tatisa keil koa ave enges envati. Avahasi keil ka aselus luvos meatin sav keke avakur tounah ran keil.

Selkatien Ekor

17 Ka onak eli keil, mihendem kat asa koa eiloheh keil onen Asuv orer, Iesu Kristo, aviteni min kami avit hemai hekistal. 18 Keil avit, “En Avong Ekor keil, meatin keil imai ikikistal koa iselus karen tounah koa tahos ka usil kat sakien tatisaso one enges.” 19 Vati meatin keil enek amumon kami mimul miretasil. Amusil sakien keil ten out netan enges, ka Ninin Votut tovuol en keil. 20 Ka onak eli keil, kami mihelei revi hihiseien ten anatinien keke demkatien votut onami hemoul hemarite. Mihehis en keihoen koa ka ven Ninin Votut. 21 Ka mihetie lati keke moulien onami vilelau en envatien onen Ahi, navong mirosin avong koa Asuv Iesu Kristo hemai ris eni keke hesan moulien ten lisenges min kami ven enmahisien onen.

22 Min koakeil desien one en Ahi rorokat revitei, mihekataun keil en sakien ten enmahisien. 23 Min koakeil vesesal avahut avaha en ahang, mihesakit lat keil rani. Ka min koakeil akapil ral min tiser taliluvosien keil enek, emihemahis keil ka mihelei kat revi kami keke analehtei rendemien onami. Sakien keil tatisaso keil one, tinomi heati. Anatin, tounah vasi emun koa arokoli, miheseseini varei, veni sakkalkalien keil one sakini mai vilehilu.

Selusien Ten Masmasien va min Ahi

24 Ahi enges vinvin keke mimasmasi. Veni kei enges kilea vahuli kat kami keke mihermottei en demkatien onami. Kei enges kilea vasakin kami mivatolas ka mivasi kami navong helamun kami mihemai mihelomal en meten ka miheles hetetamenien onen. 25 O anatin, Ahi enges vi Ahi anatin koa mutut ir ka en tounah koa Iesu Kristo, Asuv orer, mumoni. Mihelei kilea keke muohien, hetetamenien, keihoen, ka hiasuvien, mul ien en avong telamu, en avong kosa, ka en avong vasi koa hemai veah, lises ka lisenges. Anatin.